خبيزات الجبن

السلام عليكم، اليوم مع وصفة جديدة من مطبخ ام علي انشاء الله، تحت طلباتكم لوصفات المقبلات، جبتلكم اليوم وصفة سهلة، و هي خبيزات محشيين بالجبن مذاق تاعهم يهبل و يجيو خفاف و هشين، ما شاء الله نبداو على بركة الله :

المقادير : 

• 500 غ فرينة 
• 1 م ك حليب بودرة 
• 1 ملعقة صغيرة سكر
• ملعقة كبيرة خميرة الخبز
• 2 ملعقة زيت 
•  ملح
•  حبة  بيض
• ماء يكون دافي 

التحضيير :

1. نخلط المكونات الجافة و هي الفرينة ، الحليب بودرة ،الملح ، السكر ، و نكون درت الخميرة تخمر في شوية ماء و نزيدها للخليط ، نضيف الزيت و حبة بيض و نبل بالماء حتى نتحصل على عجينة طرية . نتركها تخمر لمدة نصف ساعة .
2. بعد ما تخمر نشكل كويرات نبسطهم بيدي و ندير داخلهم فرماج ابيض نكون قطعتو مربعات و نعاود نغلق العجين و نكورها ، ثم نديرهم فالصينية و نخليهم يزيدو يخمرو لمدة 15 دقيقة . ثم ندهنهم بالبيض و نديرلهم شوية جلجلان او سانوج اختياري  و ندخلهم الفرن حتا يحمارو .

و شهية طيبة .